هوجع دماغكم للمرة الألف بحكم وأقوال المشاهير .. طيب بما أن الفترة دى فترة امتحانات عصيبة فالجملة المقتبسة المرة دى لازم تكون ليها علاقة من بعيد أو قريب بالأمتحانات .
نشوف وودى ألن أبو دم خفيف وهو بيتكلم عن مرة غش فيها فى امتحان وازاى غش
“I was thrown out of college for cheating on the metaphysics exam; I looked into the soul of the boy sitting next to me.”
هههههههههههههههههههه
والله الغش دلوقتى بقى ليه تقنيات عالية أوى .. بس فيه سؤال بقى .. لو كنت مزنوق فى سؤال جامد لكن أنت عندك عقيدة أنك مستحييييييييل تغش .. لكن وأنت قاعد فى اللجنة هتموت و تحل السؤال ده , يصادف أن يكون قاعد جبنك على يمينك و يسارك أحد محترفى الغش وقاعدين ينقلوا المعلومات لبعض .. وفجأة تلاقى إجابة السؤال المطلوب داخلة ودنك بدون استئذان .. هتعمل ايييييييييييه؟؟
1. مش هجاوب على السؤال لأن إجابته جاتلى عن طريق الغشاشين وأنا مش غشاش
2. فرصة وجات من غير تعب
3. من البداية هبلغ المراقب أن فيه ثمة غشاشين بجواااااااااااارى
4. هشترك مع الأخوة الغشاشين فى دفع الكرب عننا
5. فيه غش عن غش , بمعنى أن لما أغش عشان أعرف قانون مش فاكره غير لما أغش عشان مش لاقى حاجة اكتبها اصلا
6. إجابة أخرى
مواضيع القوانين ده بالذات كانت أكتر حاجة بتخنقنى فى الكلية , أنك تدخل امتحان بقوانين حافظها وبس .. ولو حصل والقوانين كانت مع ورقة الأسئلة يبقى الامتحان هيبقى من نوع “أبقى قابلنى” , أو ممكن الدكتور يقول مثلا “لو ما افتكرتش القانون أبقى أفرض أى حاجة وكمل حل عادى” وساعتها الامتحان بيبقى من نوع “مين طفى النور” .. أو تبقى الطاااااااااااااااااااااامة الكبرى لو الأمتحان معاه القوانين والمنحنيات والحاجات و المحتاجات لكن من نوع اسمه (لمسة) .. يعنى الدكتور ضايف اللمسة السحرية والنكهة الذكية للأمتحان , وطبعا أنتوا عارفين أكيد يعنى ايه لمسة الدكتور السحرية المضاف إليها النكهة الذكية .
الامتحانات اللى بتبقى من نوع “لمسة” بتيجى على صحة الواحد .. واحد صاحبى بعد ما خلصنا امتحان من نوع “لمسة” , جه يقوم من على الكرسى وقع .. اه يعنى جه يقوم وقع ؛ لأنه ركبه كانت سابت خالص من لمسة الدكتور , وهوووووول الامتحان .. صاحبى الأنتيم تجرأ وسأل دكتور من اللى بيكتبوا امتحان من نوع “لمسة” على حاجة فى الأمتحان , فأجابه الدكتور قائلا “أنت مبرشم يا حمااااااااااااااااااااار” , طبعا تعالت الهمهمات الضاحكة من تحت لتحت فى اللجنة .
بالنسبة للعبد لله , بكره الغش عمى ولو حصل ومالاقتيش حاجة اكتبها (حصلت) مش بكتب حاجة أو مش بحضر الأمتحان من أساسه (حصلت مرة واحدة فى امتحان ميد-تيرم) .. لكن -واه من لكن- فى أخر عشر دقايق فى أخر امتحان فى أخر سنة خاااااااااااااالص فى الكلية كان فيه سؤال عارف أحله لكن المشكلة فى القانون .. القانون طاااااااار من دماغى لأنى ماكنتش مذاكر درسه أوى .. فقلت لنفسى حرام بقة , لازم أعرف القانون بأى طريقة , فسألت اريال الأرسال والاستقبال اللى على يمينى , وهووووووب نقرنى دكتور من بعيد .. فتقدم ناحيتى وبمنتهى ال …… قالى “والاااااااااااااااا , أنت عايز تتطلع بره” .. أنا كنت وصلت لأقصى درجات الخنقة فقلتله بمنتهى البروووووووووووووووووووود “لأ” وبصيت الناحية التانية ولا كأنى بكلمه .. كان عندى أحساس أنها هتبقى ضلمة ومش هاخد لا شهادة ولا نيلة وخصوصا أن الدكتور ده كان من نوع “ولما يلبد تبقى ليلتك كحلى” .. بس الحمد لله , الدكتور مشى فى سلام تام ودى كانت ذكرى المرة الوحيدة اللى حاولت أغش فيها فى الكلية
اه القانون , ما أنا عرفته من الأريال اللى قاعد على يمينى قبل ما الدكتور ينقرنى بعيناه الثاقبتين
المهم , أشوفكم بكرة بقة ان شاء الله مع مفاجأة , حذروا فذروا جايبلكم معايا ايه بكرة , هاه ,تاااااااااااااااااااااااااااااااااااااااااااااااااااااااااااج
المشكلة بقة أن الشيطان بيوذنى أنى أمرر التاج ده ل 80 مدون و …….. مين اللى رمى الطوبة دى ؟؟
بى أس :
عنوان البوست جملة قالها عبد المنعم مدبولى الله يرحمه فى مسرحية ريا وسكينة
إرسال تعليق